|
Binalawang Santol Ito ay santol na kinayod at niluto sa gata ng niyog na kapag humalimuymoy ay pagkaangut-angot dahil sa inilahok na balaw na gawa sa tinadtad na hipon.
Lain Ang kilalang pinangat ng Maubanin na nilalagyan sardinas o tuyo na may pagkarami-raming luya, binalot sa dahon ng gabi at lulutiin sa gata ng niyog, mas masarap kapag maraming malapot na liputók. Ang simpleng version ng pinangat ay ang binutno. Ito ay lain na ibinutno na basta niluto sa gata, tinuto na tinagártar na lain na niluto sa gata ng niyog at luya.
Ginanga Isdang nilagyan ng pampaasim ordinaryo na ang suka bilang pampaasim o kalamyas ang gamitin para mas neytib ang lasa
Ginataang Kamansi Neytib na langka na nilalagyan ng gata ng niyog.
Pinais Neytib na lutuin na ginagamitan ng kinayod na laman ng niyog, nilalahukan ng hipong dagat o ilog at ibinabalot sa dahon ng saging
Tininghi Ang lutuing ito ay katulad din ng pinais ang kaibahan lang ay hubad ito o hindi binabalutan ng dahon ng saging
Suso Ginat-ang bayuko, haplâ, kuhol susong tilaok,ulibas, balikunong, bukalò, at tapalang na nakukuha sa malapit na ilog o pakatan,gasangan at dagat. Masarap itong haluan ng kahit na anong talbos na dahon. Lauya Ang isa sa pinakasimpleng paraan ng pagluluto ng isda at mga uri ng suso tulad ng bibi (parang tapalang ngunit mas maliit) at tulya (mas maliit kaysa bibi at maitim-itim ang bahayan) ay ang pagpapakulo na may sahúg na luya at kamatis.
Eskabetse Niyadyad na papaya na ang pagkaluto ay manamis-namis at maasim-asim na kilalang pampagana ng Maubanin.
|
